盈科保險

以往保險agent都是靠人傳人的方法找新生意。近幾年保險公司經常有新的屎橋，其中一樣就是派樣子甜美的妙齡少女攔住在街上的單身男仕，以做問卷為名，做完之後將被訪者推上停泊在附近街邊的旅遊巴，讓另一個沒那麼甜美、也談不上妙齡的人類推銷不同類形的保險計劃。可能因為屎橋真的發生效用，由 Ａ字頭到Ｚ字頭的保險公司都用同一方法做生意，其後甚至有以年輕男仕吸引女仕的版本。如果時間很多的話我也會上車吹冷氣聽聽有甚麼廢話。

跟朋友約好到之前提過的Jolly Thinkers吃東西，之前本打算到新世紀廣場買點東西，不過卻被一個盈科保險的問卷人攔住了。「我冇興趣，不過你不怕嘥時間我都可以聽下…」即使我如是說我還是被拉上車了。跟以往不一樣，這次的經歷比較搞笑。以下為部份精華片段：


佢：如果供廿六萬拎返一百萬有冇興趣？
我：幾耐先拎得返？
佢：咁就要睇你供幾耐喇！
我：咁係咪我依家有廿六萬，聽日就可以拎返一百萬？

我：呢個plan同平時見開的儲蓄保險有咩唔同？
佢：呢個savings的成份高啲！
我：咁policy fee要幾錢一個月？
佢：(理所當然地)冇policy fee架！
我：下？真定假？

佢：呢個plan有樣好就係個紅利依消費物價指數來決定！
我：(睇到proposal後面)咁係咪佢每年寄一封信俾我，如果我accept就加我利息？既然係有加冇減我點解會唔accept？
佢：(唔明我問乜)唔係架，因為改左你個policy所以要你簽名，如果唔係唔生效。
我：但呢度唔係咁寫喎，佢話唔回當生效。
佢：(同樣理所當然地)唔係架，真係要你回信先會生效。
(proposal寫的其實是每年會依甲類消費物價指數加保費最少3%及相應提高保額，如果不回覆當接受。對於紅利依甚麼方法決定是隻字不提。)

我：(睇住張俾18歲Ａ小姐的proposal)係咪如果年齡唔同咁保費都唔同？
佢：係架！
我：我xx歲喇喎，你做乜俾張18歲嘅我？
佢：你個樣後生嘛，點估到你咁大個。
我：點會唔知，頭先(推我上來果個)人唔係問左我幾多歲架咩？同埋點睇我都唔似女人嘛！
佢：其實呢個plan係俾18至22歲的人，我冇諗過你會有興趣架嘛。
我：冇興趣你又俾我睇！


下次上車前要開錄音機。